ഒരു ചെറിയ ഇടവേളയ്ക്കു ശേഷം നമ്മള് വീണ്ടും മെഹ്ദിയിലേക്ക് തിരിച്ചു നടക്കുന്നു. ഇത്തവണ പ്രണയിനിക്ക് മുന്നില് തന്റെ വിശുദ്ധ പ്രണയത്തെക്കുറിച്ച് ഒരു അഫിഡവിറ്റ് തന്നെ സമര്പ്പിക്കുന്ന കാമുകന്റെ ചിത്രം തന്റെ ശബ്ദവീചികള് കൊണ്ട്
വരച്ചിടുകയാണ് മെഹ്ദി സാബ്. ഖതീല് ശിഫായിയുടെ ലളിതവും സുഗ്രാഹ്യവുമായ വരികള് മെഹ്ദി യുടെ ആലാപന വൈവിധ്യം കൊണ്ട് അങ്ങേയറ്റം പോപ്പുലര് ആയി മാറുകയായിരുന്നു. 'ഗസല്' എന്ന പദത്തിന് കല്പ്പിക്കപ്പെട്ടിട്ടുള്ള ഒരര്ത്ഥം 'പ്രണയിനിയുടെ കാതില് സ്വകാര്യമായി മന്ത്രിക്കുന്നത്' എന്നാണ്. ആ അര്ത്ഥത്തിനോട് ഏറ്റവും ചേര്ന്ന് നില്ക്കുന്ന ഒരു ഗസലായി ഈ വരികളെ കാണാം.